DÍA MUNDIAL DAS TELECOMUNICACIÓNS E A SOCIEDADE DA INFORMACIÓN

“Unha computadora é para min a ferramenta máis sorprendente que teñamos ideado. É o equivalente a unha bicicleta para as nosas mentes” 
                                                                                                                                 Steve Jobs

   
Este 17 de maio celebrouse o Día Mundial das Telecomunicacións e a Sociedade da Información baixo o lema "Telecomunicacións e TIC: motores da innovación”. Este día ten como un dos seus obxectivos fundamentais dar a coñecer as posibilidades que pode ofrecer a utilización de Internet e outras tecnoloxías da información e a comunicación  á sociedade. Ademais, neste ano, 2015, conmemórase o 150 Aniversario da Unión Internacional de Telecomunicacións. A historia da UIT constitúe un bo exemplo dunha das dimensións máis relevantes da habilidade humana, dende os tempos do telégrafo ata Internet e a banda ancha móbil. 

         

Para máis información acerca dos acontecementos que marcaron a historia da ITU, podedes visitar a seguinte liña do tempo: http://itu150.org/historical-timeline
   

DÍA DAS LETRAS 2015

Un curso máis celebramos o Día das Letras, dedicado este ano ao  historiador, escritor e político Xosé Fernando Filgueira Valverde (Pontevedra, 28 de outubro de 1906 – 13 de setembro de 1996). E facémolo, da man do ENDL e inspirados polo poeta Igor Lugrís,  baixo o lema “A miña lingua quero na túa boca”:

Día de combater desánimos. 

Día de sementar esperanzas. 

Día de promover e compartir palabras.   

Día de reivindicar verbos, adverbios e adxectivos. 

Día de presumir orgullosos desta xoia que é a nosa lingua.



                                                                  

Manuel Núñez Singala presentou no noso Instituto a súa obra Instrucións para tomar café. Nela reflexiona sobre o que "somos como galegos e como seres humanos" e o "pouco aprecio que os galegos nos temos a nós mesmos". Ademais, o grupo de teatro TEIROA fixo unha breve intervención-adaptación sobre este texto.















Aproveitamos para recordar as actividades máis importantes que se realizarán (e as que xa se realizaron) no Instituto durante este mes:

CONFERENCIA: O HOMO HABILIS E A ESCRITURA

Este venres, o alumnado que participou nos proxectos "Evolución da notación musical", "Sistemas de numeración do mundo" e "Alfabetos do mundo", compartiu con nós o seu traballo nunha excelente exposición que tivo un gran éxito entre alumnado e profesorado. Os nosos parabéns a  David, Nerea, Carlos, Bruno, Ángel, Marta, Iria, Manuel, Aziz, Brais, Jorge, Yeray, Carlos M., Nuria, Uxía, Santiago, Pablo, Cristian, Saray, Lara, Raúl, Alejandro, Sabela, Brais E., Abel, Laura, Lucía, Michel, Laura P., Noelia, Adrián, Marcial, Zaira, Lucía I., Carlos Mejuto, Leandro, Adrián C., Paula, Sara, Diego, Álvaro, e ao alumnado de Música de 1º de Bac.


                      

CONFERENCIA DE CARLOS NEGRO

Onte tivemos a ocasión de recibir no noso Centro a Carlos  Negro,  grazas a una conferencia organizada polo Departamento de Lingua e Literatura Galegas. Así é como a describen dúas das nosas alumnas,  Virxinia e Iria.

O pasado xoves 7, no IES de Melide, recibimos cunha gran aperta a Carlos Negro. Principalmente, este aclamado escritor galego veunos falar dunhas das súas coleccións de poemarios máis vendidas entre o público xuvenil, pero tamén entre os que non son tan mozos: Makinaria e Penúltimas tendencias. Estas obras amósannos dous mundos paralelos que se contrarrestan; por unha parte, o mundo da velocidade, do ruxir dos motores dos coches, da inconsciencia e despreocupación dun mozo que só quere vivir a súa xuventude ao límite do contaquilómetros, como se o reloxo da súa vida rematase na seguinte curva, que ao final muta na desgraza de perdelo todo e as palabras dos que o queren caen nunha caixa, onde queda el só nun cemiterio. E o mundo de color rosa, os estereotipos formados ao redor da personalidade feminina e da muller perfecta  que queren ser esnaquizados por una rapaza cansa de que o mundo sexa  fashion & cool & chic & sexy.

Carlos Negro, mergullounos na súa charla cunha lectura dramatizada dun libro portugués, Uma princesa do pior. Nel, unha princesa, que non desexa selo, decide fuxir do seu príncipe e librarse das súas ataduras para aventurarse nun mundo novo xunto o seu estraño amigo. E, finalmente, recitounos algún dos poemas destas significativas obras. De Makinaria ensínanos a evolución da testosterona acumulada á morte con "Sound Play Session Vol.1" (coa que nos fixo rapear ao ritmo dos motores acelerados) e "Nota Necrolóxica" (que nos amosaba o lado escuro da moeda, coa que queda un sabor amargo na lingua). En cambio con  Penúltimas tendencias fainos recapacitar sobre a realidade color rosa que nos envolve a nós, as mulleres, e a través da voz dunha rapaza que quere romper as costuras dos seus beizos e desexa gritar que non todo é superpop e megafashion. Mentres alude a poemas como: Barbie girl, Guapa y a la última, A que sabe o amor?,... Carlos Negro ensínanos o que contén a súa maleta, chea con todo o que utilizou cando se documentou para escribilos, e vainos explicando que a sociedade céntrase nun modelo de muller, que non existe, porque somos únicas e inimitables. Esa rapaza utiliza a súa voz para mostrarnos, ao final do libro, unha nota que nos desvela esta realidade.

Antes de firmar os nosos libros, entregounos papeliños onde aparecían pequenos poemas de escritoras galegas a prol do feminismo. Aí van algúns:

Prefiro ser a filla do pirata,

a nena imposíbel que non peitea os cabelos,

a mesma que salta e corre

ou vence un exército.

            Marta Dacosta     

Escribo

porque

estou contenta e

libre,

porque teño

palabras

que corren

polo monte

como cabalos.

            Lupe Gómez   

Virxinia Mosteiro S3B

  

O pasado xoves 7 de maio, o escritor galego Carlos Negro (Lalín, 1970) agasallounos aos alumnos e alumnas de terceiro da ESO cunha interesante e divertida charla sobre dous dos seus grandes éxitos na literatura xuvenil: Makinaria e Penúltimas tendencias. Makinaria é un conxunto de poemas que tratan da vida aloucada dos mozos de 18 anos, que soamente pensan en queimar a goma das rodas e sentir a euforia correndo polas súas veas, sen importar o que ninguén lles diga, ata que é demasiado tarde. Con ela, trata de nos facer ver o ridículo da situación para evitar que sexa demasiado tarde tamén para nós.Penúltimas tendencias é tamén un conxunto de poemas que falan da gaiola que atrapa a xente coas súas revistas Super Pop e Megafashion, que nos fan ver que o mundo é rosa, que nos din como debemos ser para poder triunfar na vida…, e con ela o autor quere facernos ver que nós somos únicos na nosa forma de ser, e non como os demais queren que sexamos. 

                                                                                          

Carlos Negro comezou contándonos o conto portugués Unha princesa do pior. Nese momento xa nos deu a amosar unha pequena parte do seu carácter tranquilo e animoso. Continuou falándonos un pouco sobre Makinaria, onde se demostrou que Carlos Negro é unha persoa moi agradable e divertida. Despois de mostrarnos uns coches de xoguete musicais para presentar o argumento de Makinaria, fíxonos rapear un pouco algúns poemas como "Sound Play Session Vol. 1" ou "Nota Necrolóxica", facéndonos tamén pasar un bo anaquiño. Pero a quen lle dedicou a maior parte do tempo foi a Penúltimas tendencias. Ensinounos o contido do seu baúl, que contiña os obxectos nos que se inspirara para escribir a súa obra, non sen antes parodialos un pouco. Ensinounos o seu diario de One Direction, ou a súa tétrica boneca Corvo, que a pesar de ter un carácter escuro, ten tamén un corazón moi puro, como nos ensinou Carlos. Despois de mostrarnos que nós eramos únicos ensinándonos o noso reflexo nun espello, agasallounos ademais cunha dedicatoria a aqueles que a quixemos, identificando cun simple saúdo que lle entregabamos, a frase que mellor encaixaba co noso caracter (e sorprendentemente, conseguiuno). Na miña opinión, ademais de falar claramente e abrirnos a nós un pouco os ollos, Carlos Negro é unha moi boa persoa que nos marcou a todos un sorriso na cara ademais dunha pegada no corazón. 

Iria Barreiro Vázquez. 3º ESO B

DÍA DAS LETRAS 2015

Un ano máis, o Equipo de Normalización Lingüística e a Biblioteca Xaquín Yebra convoca o Certame Literario "Día das Letras 2015". Convidámosvos a tod@s a participar!

              CERTAME LITERARIO

           "DÍA DAS LETRAS 2015"

               A BIBLIOTECA e o EQUIPO DE NORMALIZACIÓN E DINAMIZACIÓN 

                    LINGÜÍSTICA do IES de Melide, convocan o Certame Literario

                                                          "Día das Letras"

BASES

1. Poderá participar no Certame calquera alumno ou alumna do Centro.

2. Establécense as seguintes modalidades de participación:

a.      Poesía.

b.     Prosa.

c.      Ensaio.

d.     Traballos de recuperación e salvagarda da memoria comunitaria.

3. Especificamente, entenderase a efectos do Certame que os traballos de recuperación e salvagarda da memoria comunitaria son aqueles que dalgún modo recuperan, para salvala do esquecemento, a memoria de formas de vida, traballos comunitarios, tradicións, costumes... das xeracións pasadas.

4. As obras presentadas deberán estar escritas en lingua galega.

5. A extensión e os temas dos traballos a presentar son libres.

6. O xurado estará composto por representantes do alumnado, do profesorado e do persoal non docente do Centro.

7. Os traballos, nos que se farán constar os datos do/a autor/a, deberán presentarse na Conserxería do Centro antes do 15 de maio de 2015.

8. Os premios serán entregados durante a celebración do Corremelide-2015