QUE LIBRO SALVARÍAS?

Con motivo da conmemoración do Día da Biblioteca, @s nos@s usuari@s tivéronse que enfrontar a un difícil reto: salvar un só libro no caso de que un incendio, inundación, invasión extraterrestre...,  arrasara  a súa biblioteca. Estas son algunhas das respostas:


                           

                           O libro que salvaría from loli2015

24 DE OUTUBRO, DÍA DA BIBLIOTECA

O 24 de Outubro conmemórase o Día da Biblioteca, dedicado no noso país especialmente ao público infantil e xuvenil. Esta proposta xorde en 1997, da man da Asociación de Amigos do Libro Infantil e Xuvenil, en recordo da destrución da Biblioteca de Saraievo, que chegou a converterse nun símbolo de convivencia entre as distintas comunidades étnicas da cidade. Esta circunstancia fixo que un bombardeo caese sobre ela na madrugada do 25 ao 26 de agosto de 1992, provocando a destrución do 40% do material que albergaba. Este suceso tivo lugar dentro do contexto da Guerra dos Balcáns (1991-2001), caracterizada por conflitos étnicos entre os distintos pobos da ex Iugoslavia, que impulsaron a eliminación do outro e da súa memoria escrita e cultural.
Tras este ataque, o médico e historiador croata Mirko D. Grmek acuñou o termo memoricidio para definir a destrución da memoria e o tesouro cultural do outro, do inimigo.
O obxectivo do día que hoxe celebramos é trasladar á opinión pública a importancia da Biblioteca como lugar de encontro dos lectores de todas as idades coa cultura e como instrumento da mellora da formación e a convivencia humana.

HOMO HABILIS

Por fin facemos público o tema de traballo deste curso. Por que escollemos como lema Homo Habilis, un tecnicismo en latín?  Seguindo case literalmente a wikipedia anotamos que a grande innovación do Homo habilis foi a utilización de ferramentas, o que lle deu primacía sobre os primates. Esta habilidade física e, máis concretamente a manual, foi logo motor de progreso na evolución humana. Queremos, polo tanto, traballar en torno á esta destreza característica do home que tanto nos diferenza dos animais e que fixo posible que o ser humano desenvolvese técnicas e xa logo artes plásticas  que lle permitiron mellorar as súas condicións de vida .
Abrimos, deste xeito, a posiblidade de realizar moitas actividades relacionadas co noso entorno máis inmediato, como os oficios tradicionais e a artesanía na Terra de Melide, e a botar man das habilidades do alumnado do noso centro, no que abundan dibuxantes, deseñadoras de xoias, magos, campioas nas distintas técnicas de loita, futbolistas, bailarinas, veteranos xogadores de xogos tradicionais, afeccionados cociñeiros, fotógrafas e cámaras e toda unha lexión de músicos/as, sen contar xa aos nosos artistas do ciclo de madeira. Tan importantes son as mans, que poden ser a voz e o son dalgunhas persoas, como Juan Carlos
Dedicaremos atención especial ás artes plásticas a música, a tecnoloxía e a calquera cousa que se faga coas mans (ou pés...) e a súa relación coa literatura.
Unha das nosas actividades estrela será un roteiro teatral que se fará nunha aldea da terra de Melide, aínda por determinar, e no que participaráian, ademais do alumnado e profesorado do centro, artesáns da Terra de Melide e os propios habitanes da aldea. Será unha versión reducida de Son D'Aldea, que terá lugar no mes de marzo de 2015.
Pretendemos, pois, visibilizar e poñer en valor todo aquilo que se fai coas mans, tan mal visto nalgúns momentos da nosa historia. Dicía o filósofo grego Anaxágoras que o home é o máis intelixente dos animais por ter mans. O alumnado de grego de 1º de BAC encargouse de rotular esta frase en grego e en galego para que sirva como punto de partida do noso traballo. Esta afirmación ten unha dobre lectura, é a intelixencia humana a que permite a nosa habiliade manual? ou é este dominio das mans o que estimula a nosa intelixencia?
E mentras reflxionamos sobre isto, deixámosvos un fermoso vídeo no que podemos ver como unha mullier habilis saca partido ás súas mans debuxando con area.

HOMENAXE A XAQUÍN YEBRA

Se interrumpíamos as nosas vacacións de verán para comunicar a triste nova do pasamento do noso querido compañeiro e profesor Xaquín, queremos comezar o curso co seu recordo, por unha banda como esconxuro para botar fóra a nosa dor e por outra como agradecemento por todo o que el nos aportou ao longo destes anos.
O IES de Melide a través do equipo da biblioteca está a organizar unha xornada de lembranza que se celebrá no noso centro o sábado 25 de outubro ás 11.00. Aínda que non temos un programa pechado, podemos adiantar que comezaremos prantando un carballo ou outra especie autóctona no noso xardín, xa que Xaquín era un gran amante das árbores, seguiremos cun recitado dos textos e poemas cos que el nos foi agasallando estes anos, proxectaremos un vídeo que tentará recoller o seu semblante no noso recordo, charleremos con amigos e compañeiras/os cos que Xaquín compartiu loitas e remataremos cun xantar. En todo o acto contaremos coa música interpertada polo alumanado do centro, polos históricos membros da Quenlla Mini e Mero e, talvez, por agrupación musical melidense.  As protagonistas do acto serán as alumnas e alumnos do IES de Melide que contarán co apoio do profesorado e a asistencia non só da comunidade educativa senón tamén daquelas persoas que compartiron os seus compromisos sociais: a memoria histórica, a loita poos dereitos das presas e presos...
O lugar onde se desenvolverán parte dos actos será a nosa biblioteca, que ao igual que as outras dependencias do centro que teñen nome, pasará a chamarse "Biblioteca Xaquín Yebra", porque é grande o legado que nos aportou.
Segue a organización deste evento no Facebook https://www.facebook.com/homenaxexaquinyebra

ADEUS, QUERIDO XAQUÍN

Hoxe deixounos Xaquín Yebra-Pimentel, profesor de Historia do IES de Melide. Somos moitos os alumnos, alumnas, compañeiras e compañeiros, persoal non docente, pais, nais.... que non tivemos tempo para agradecerlle o moito que nos deu todos estes anos no IES de Melide.
A perda de Xaquín déixanos algo orfa a toda a comunidade escolar pola súa calidade humana. Pero ademais Xaquín era un home xeneroso coa súa inmensa cultura, achegándanos a cada un de nós mundos descoñecidos cada vez que nos traía un libro, un fermoso texto ou un obxecto marabilloso das súas coleccións de arte. Sen dúbida el era un deses homes xustos a quen dedica Jorge Luis Borges o seu poema:

Un hombre que cultiva un jardín, como quería Voltaire.
El que agradece que en la tierra haya música.
El que descubre con placer una etimología.
Dos empleados que en un café del Sur juegan un silencioso ajedrez.
El ceramista que premedita un color y una forma.
Un tipógrafo que compone bien esta página, que tal vez no le agrada.
Una mujer y un hombre que leen los tercetos finales de cierto canto.
El que acaricia a un animal dormido.
El que justifica o quiere justificar un mal que le han hecho.
El que agradece que en la tierra haya Stevenson.
El que prefiere que los otros tengan razón.
Esas personas, que se ignoran, están salvando el mundo.

ENTREGA DE PREMIOS XOGO DE PISTAS

Nestas últimas semanas tivo lugar o xogo de pistas "De película", que consistiu en buscar o título de filmes a partir dunhas siluetas de imaxes, que aparecían no cartel de "Un ano de película" e unhas pistas. Tamén tiñan que atopar o URL que nos conducía ás imaxes. Houbo dúas modalidades, unha para 2º ciclo de Bacharelato, madeira e adultos, e outra para o alumnado de 1º ciclo da ESO.

Despois dun emocionantísimo e rifadísimo  xogo no que houbo moitos grupos que obtiveron a totalidade dos puntos e que desempataron a tempo, hoxe, por fin, entregáronse os premios aos/ás gañadores/as, que foron:

-O grupo Mafalda e Manolito, composto por Pablo G. Remeseiro e Iris Parrado López, de 2º de Bacharelato.

- O grupo Sometimes, formado por Paula Ares, Ángela Prado e Virginia Mosteiro, de 2º de ESO.

Parabéns  a todos/as por participar, e, especialmente aos grupos gañadores.

DÍA DAS LETRAS 2014

Este ano, o Día das Letras estivo dedicado ao autor do libro de poemas Nimbos, Xosé María Díaz Castro. Nós quixemos ofrecerlle unha pequena homenaxe recitando algúns poemas na biblioteca, entre eles o coñecidísimo Penélope ou o non tan coñecido Coma unha espada, do que incluímos aquí a letra.

COMA UNHA ESPADA

Tódolos ríos pasan pola miña

alma, cheos de Deus, música e lapas.

Tódalas pombas fan o meu amor.

A beleza feriume para sempre.

Ó traveso da escura teadearaña

deste mundo unha estrela cai no río

da miña vida e quédame chamando.

A beleza feriume para sempre.

En cada voz eu oio unha chamada

cun longo eco de adeus que non entendo,

pro que me fire como espada ardendo.

A beleza feriume para sempre.

E as falopas dos anos van caendo

sobre a sede inmortal e os ollos tristes,

¡Pro non enterran a boca da ferida!

A beleza feriume para sempre.

AGASALLO DÍA DAS LETRAS

Este ano o alumnado da Terra de Melide recibiu un fermoso agasallo, ideado polo ENDL do IES de
Melide. No instituto foron as alumnas e alumnos do grupo teatral Teiroa quen se encargaron de repartir os galanos ao tempo que representaban polas aulas unha improvisación baseada en textos de Sechu Sende. O agasallo consistiu nun estoxo que contiña dentro este fermoso tesouro:

ESTOXO DA LINGUA INSTRUCIÓNS DE USO

1. Indicado para gardar lapis, bolígrafos, plumas e demais dispositivos que escriban palabras en galego.

2. O material gardado neste estoxo, e as palabras que con el se escriban, deben ser usadas de xeito diario e continuado.

3. As palabras así escritas deben ser tratadas con moito agarimo, tendo sempre moito tino de que non se perda ningunha ou se borre, xa que constitúen a nosa máis prezada propiedade. 

4. Este tesouro inclúe unha enorme variedade: pronomes atrevidos, adverbios incribles, conxuncións entremetidas, indefinidos que non se mollan, adxectivos para dicir as cousas máis lindas ás persoas que queremos, verbos moi prácticos, nomes de persoas para poñerlles aos nosos fillos e fillas…

DERRADEIRA CONSIDERACIÓN

Este estoxo non é calquera cousa e, polo tanto, o seu uso debe perdurar, cando menos, toda a vida do seu propietario ou propietaria.

CERTAME LITERARIO "LETRAS GALEGAS 2014"

Como todos os anos por estas datas, o Equipo de Normalización Ligüística e a biblioteca do IES de Melide convídanvos a escribir no foramto que máis vos guste o vos inspire. Este ano como novidade engádese unha nova categoría: "Traballos de recuperación da memoria comunitaria" e ben se podían animar algúns rapaces e rapazas de 1º de ESO a presentar o magnífico traballo que fixeron na clase de sociais...

Certame Letras Galegas 2014

8 DE MARZO, DÍA INTERNACIONAL DA MULLER

Dentro do noso "Ano de película", queremos rendir un homenaxe a todas aquelas mulleres relacionadas co cine, moitas delas xa esquecidas.

PRIMEIRO FESTIVAL DE MELIWOOD

Neste entroido tivo lugar no IES de Melide a primeira edición do Festival de Meliwood, comoo unha actividade máis do noso tema de traballo Un ano de Película. É de destacar a calidade das "películas" participantes, algúns clásicos coma: MARY POPPINS, PIRATAS DO CARIBE, MAGO DE OZ, GREASE, TITANIC, OS XOGOS DA FAME, FLASHDANCE, ZORBA, O GREGO... e outras de nova creación coma: OS EMBUSTEIROS 2.0, ANIMALS, contando co dúo PIMPINELA-Z que amenizaron a gala. Seguindo a tradición destes anos, o festival rematou cun "Salon de película", unha "estrea" do xénero western protagonizada polos profes, todo un clásico. O noso premio, O Polbo de Ouro", foi un deseño de Antonio Núñez, o profe de plástica, realizado por Anabel, de francés, a nosa artista oficial e, como non, polo imprescindible ciclo de madeira.

III XORNADAS DE ATENCIÓN Á DIVERSIDADE

Un ano máis o IES de Melide ven de organizar as Xornadas de atención á diversidade, este ano na súa terceira edición. Ao igual que o ano anterior, solicitouse colaboración ao equipo de biblioteca, neste caso para que expuxésemos o noso traballo para o presente curso Un ano de película. Aquí vai un repaso das actividades que fixemos este ano, a maioría delas documentadas neste blog, e un pequeno adianto de próximas actividades.

MOBLES DE CINE

Esta é a fantástica aportación que fai o ciclo de madeira para o noso Ano de Película. Só fai falta inciativa e vontade para descubrir as case infinitas posibilidades que ten o traballo interdisciplinar, e afortunadamente isto non falta entre o profesorado do ciclo de madeira. Podes ver este interesantísimo traballo nos corredor da planta baixa do instituto ou lelo comodamente en soporte dixital. Este traballo ensínanos a ver con outros ollos películas que xa vimos ou a fixarnos en detalles nos que non se nos ocurrira reparar. Parabéns aos autores.

BICOS DE CINE

Nesta quincena dos namorados non podía faltar este pequeno traballo, no que as alumnas e alumnos de reforzo de 2º B e C recolleron algúns dos mellores bicos na historia do cine. Que rematedes felizmente esta quincena dos namorados/as.

A ASASINA DE A. PAPADIAMANDIS

As alumnas e alumnos de literatura galega de 1º de BAC están a ler A Asasina de Papadiamandis, libro publicado en 2013 pola editorial Hugin e Munin, do que xa deramos noticia no seu día. Deixámovos aquí unha información, na súa maior parte gráfica, que vos pode axudar a entender mellor o contexto histórico e social desta novela. Tedes máis información sobre a obra no blog Aspasia, do departamento de grego.

QUINCENA DO AMOR

A Candeloria celébrase o 2 de febreiro e nela os cregos bendicen as candeas que os fieis deben ter accesas durante a misa e que logo levan as casas para que os protexan nas treboadas.
A Candeloria é tamén unha festa que celebra a proximidade da primavera, Pola Candeloria a metade do inverno vai fóra, e o tempo no que as aves se aparean, Pola Candeloira casan os paxariños e maila galiñola, polo que en Galicia celebramos o día dos namorados.
Outro día xa consolidado no mundo occidental como día dos namorados é o 14 de febreiro, día de S. Valentiño. Entre ambas datas lanzamos o noso concurso de cartas e chíos de amor.ide pensado o que ides escribir. Olla as bases

30 de Xaneiro: unha película pola paz

Así amencía decorado o noso centro este xoves 30 de Xaneiro, día internacional da paz, despois dun mércores de intenso traballo coordinado por vicedirección e no que participou, entre outros, o equipo de biblioteca. Como este é Un ano de Película, desta cámara de cine na porta da nosa biblioteca sae unha película de frases da paz en varios idiomas, asinadas por grandes homes e mulleres, moitos deles escritores, que copiaron pacientemente as nosas Papalibros de 2º de ESO. Escollemos unha delas, máis ben un texto, que aínda que foi escrito hai máis de 60 anos polo dramaturgo e poeta alemán Bertold Brecht, goza de rabiosa actualidade:

Hai moitas maneiras de matar. Poden meterte un coitelo no ventre. Quitarche o pan. Non curarte dunha enfermidade. Meterte nunha mala vivenda. Empurrarte até o suicidio. Torturarte até a morte por medio do traballo. Levarte á guerra, etc... Só poucas destas cousas están prohibidas no noso Estado.

Xa dentro da biblioteca fixemos unha exposición con libros e películas nos que a denuncia da violencia e a busca da paz son o tema principal. Podedes ver unha breve reseña das principais novidades no noso blog de club de lectura Papalibros. A primeiras horas da mañá o alumnado de 4º de ESO, fixo unha improvisación teatral titulada GUSTARÍAME ESPERTAR TODOS OS DÍAS E PENSAR QUE...

Deixámosvos cun vídeo realizado polo alumnado de 3º PDC:

Inaugurando o 2014

Calendario 2014. Un ano de Película. IES de Melide from Biblioteca_Melide

Aínda que esteamos a mediados de mes, non é tarde para desexar un feliz ano e aproveitar a ocasión para presentar o calendario "oficial" do IES de Melide para o 2014.
Trátase dunhas das actividades encadradas dentro do noso tema monográfico de traballo Un ano de película, no que participaron case todos os departamentos didácticos coordinados pola biblioteca e o EDNL. Pretendíamos facer un calendario de cine, onde as ilustracións fosen carteis de películas protagonizadas polas alumnas e alumnos do IES de Melide. Cada departamento ou titoría escolleu a película que mellor se adaptaba aos seus contidos: así os de cultura clásica escolleron a película Ágora, o ciclo de madeira Men in Black, co seu especial mobiliario de oficina, o de música Os nenos do coro, Sociais Braveheart e Casablanca, Lingua A Lingua das Bolboretas... outras inspiráronse en libros ou películas vistas na aula como Rebeldes, Harry Potter, Gandhi, A Onda, Evasión ou Vitoria, A lista de Schindler... O calendario é gratis para todos/as as participantes e os demais poderedes mercalo por un prezo non superior a 3 €.

PREMIOS A MICRORRELATOS SOBRE VIOLENCIA DE XÉNERO

O alumnado do IES de Melide demostrou unha vez máis que a literatura pode combatir a violencia de xénero. Foron moitos os microrrelatos que se presentaron á convocatoria que EDNL e Biblioteca lanzaban dende este blog. O xurado tivo que pedir axuda ao alumnado de literatura galega do s. XX e entre tod@s conseguimos consenso, concedendo os seguintes premios:

1º Ciclo de ESO: David Sesar Casal, de S2B

Ela non o lograba. Fuxiría a cada paso, alí estaba. Pedía axuda, pero interpoñíase. Ata que un día, sen previo aviso, os seus choros convertéronse en sangue

2º Ciclo de ESO: Sara Fociños Astrar, de S3B

CONFESIÓN PARA NINGUÉN 

Inmóbil, inerte,tirada no chan, mirándome. Que fixen? Por que o fixen? Isto está mal, moi mal, a miña vida, o meu amor, parece que a nosa historia por fin rematou. Que fixen? Por que o fixen? Todo foi pola túa culpa, sempre tentando tolearme, pero iso xa acabou. Todo acabou. Nunca antes che puxera a man enriba, nin a ti nin a ninguén. Que fixen? Por que o fixen? Pero os meus remordementos aquí rematan, o noso conto de fadas aquí remata. Todo o vivido, a nosa canción, a nosa balada,será substituída por un triste silencio, para sempre. Xa non o aguanto máis, o noso final será coma o de Romeo e Xulieta, tráxico, épico, un erro sen solución. Só podo facer unha cousa para acabar con este sufrimento.

BAC e CF: Belén Casal Taboada, de B1A  

TODO FOI CERTO 

Quizais el tiña razón, quizais era unha estúpida. Ao mellor merecía todas aquelas palizas, e ao mellor nunca fun unha boa esposa, como el dicía. É posible que el me amara, como sempre dixo, e que todo o fixo por min. Pero agora xa nunca saberei se todo aquilo foi certo.

PARABÉNS ÁS/OS GAÑADORAS/ES!!

UNHA VODA DE CINE

Aínda que con algo de retraso, velaí a nosa carteleira de cine, como non podía faltar neste noso ano de película.
A Noiva Cadáver, filme de animación de Tim Burton, foi un dos títulos que vimos na biblioteca como parte das actividades de samaín. No cartel vemos ao pobre Víctor, que vai ao mundo dos mortos de repente e casa, por error, cunha noiva cadáver.
Dende o día que chegou o cartel, temos voda a diario na entrada de biblioteca. Ven facer ti tamén a túa foto, pero non esquezas á túa parella. Vivan os noivos!!

PARECE DE CINE PERO NON O É

O día 25 de novembreo, Día Contra a Violencia de Xénero, o grupo de teatro do IES de Melide, TEIROA, fixo a súa primeira intervención neste curso: DICIR NON.

TEIROA realizou unha dramatización sobre conflitos en parellas adolescentes, baseados todos eles en feitos reais...por dita razón xustifícase a alusión, na presentación, a que todos os casos "podían parecer de cine pero non o son". De feito, os conflictos tiñan lugar en espazos cercanos: nos corredores do centro, no recreo, na porta de entrada...A intención era que todos nós reflexionáramos sobre a violencia da que se fai uso á hora de xestionar determinados conflitos, especialmente aqueles que xurden en torno ás parellas adolescentes, tanto na linguaxe verbal como  na linguaxe corporal, na música...Ahí vai un exemplo para que sigades pensando.... 

Escea 5 – O FACEBOOK: Antía acaba de deixalo coa súa parella, levaban 6 meses. Andrés, a ex parella de Antía é moi celoso e ela comezou a decatarse de que non era o que quería. A raíz desta ruptura, Andrés empeza a colgar en FACEBOOK fotos que comprometen a Antía e ela non sabe como rematar con este problema. Un día comenta ás súas amizades, Lucía e Iria,  que volveu con Andrés, que el está moi arrepentido.

 

@s adolescentes e a violencia de xénero

Un 21% dos adolescentes españois está de acordo coa afirmación de que os homes non deben chorar. Un de cada cinco cre que está ben que os rapaces saian con moitas rapazas, pero non ao revés. O  12,8 % non considera maltrato ameazar – ou recibir ameazas-  en caso de que a súa parella  queira romper coa relación. O 4% das adolescentes de entre 14 e 19 anos foron agredidas polo mozo co que saen ou saían; case unha de catro confesa que o seu mozo ou exmozo contrólaas ata o punto de fiscalizar con quen falan ou como visten. Control, relatan, a golpe de Tuenti e WhatsApp.

Estas son algunhas das  conclusións que se extraen do estudo  “Evolución da adolescencia española  sobre igualdade e prevención de violencia de xénero”  levado a cabo por investigadores da Universidade Complutense de Madrid coas entrevistas online a 8000 menores.

E preguntámonos: O retrato robot de como son e como viven @s adolescentes as súas relacións que se deduce do estudo mencionado,  axústase á maneira de vivir as súas  relacións @s adolescentes do IEs de Melide? Para tratar de  dar resposta e esta cuestión precisamos da vosa colaboración. Só tedes que cubrir o cuestionario  ANÓNIMO que tedes a continuación e enviarnos as vosas respostas.  

Día internacional contra a violencia de xénero

Cantas palabras precisamos para contar unha boa historia? Seguro que podemos facelo con menos de 100. Atrevémonos? O Equipo de Biblioteca do IES de Melide, en colaboración co ENDL convoca un concurso de microrrelatos con motivo do Día Internacional contra a Violencia de Xénero.Podemos escribir un pequeno texto relacionado coa violencia ou todo o contrario, un relato no que se fale dunha situación de amor e bos tratos entre os membros da familia. Aquí van as bases.

Día da Ciencia en Galego 2013: o dereito a gozar da Ciencia e a Arte en galego

Este ano, o día da ciencia en galego rende homenaxe ao arquitecto Richard Buckminster, á enfermeira Florence Nightingale e ao intelectual e artista creador de Sargadelos, Isaac Díaz Pardo. Esta edición céntrase na Estatística (estamos no ano internacional desta parte das Matemáticas) e na Arte e a Ciencia. Co obxectivo de ilustrar a estreita relación que hai entre ciencia e arte, elaboramos a presentación “A arte na ciencia, a ciencia no arte”. Na primeira parte, “A arte na ciencia”, intentamos escoller exemplos das diferentes ramas científicas (matemáticas, física, química, bioloxía,..) que nos chamaron a atención pola súa beleza. Na segunda parte, “A ciencia na arte”, intentamos ilustrar, a través da selección de obras e autores de distintos movementos artísticos, a presenza das ciencias nas artes.

PELÍCULAS RECOMENDADAS PARA NOVEMBRO

Unha das actividades deste noso Ano de película é, por suposto, desfrutar vendo cine. Estas son algunhas das películas que vos recomendamos para este mes de novembro, mes de samaín e mes no que comemoramos o día de ciencia e o día da violencia de xénero.
Pero ademais de desfrutar, os cinéfilos/as que sigan as nosas recomendacións verán que úteis lle van ser estas películas e como velas terá a súa recompensa.... (estade atent@s!)

UN SAMAÍN DE PELÍCULA,

Iniciamos este ANO DE PELÍCULA co videofórum dedicado ao Samaín. Nesta ocasión proxectáronse dúas películas: Los otros, para o alumnado de 2º de ESO e A noiva cadáver. para o de 1º de ESO.

Los otros é unha película de 2001 dirixida por Alejandro Amenábar e protagonizada por Nicole Kidman. É unha coprodución hispano-franco-estadounidense que gañou oito dos quince Goya aos que estaba nominada: mellor son, mellor fotografía, mellor dirección e mellor película.

Despois de rematar a II Guerra Mundial, Grace (Nicole Kidman) espera a chegada do seu marido que non volve da contenda. Vive nunha antiga casa grande xunto a súa filla Anne e o seu fillo Nicholas, ambos afectados por unha estraña alerxia ao sol. Cando contrata tres novos criados, unha serie de fenómenos raros comezan a acontecer na mansión que ten que estar permanentemente en penumbra polo ben dos pequenos. Así, á luz das velas, Grace deberá descubrir o que está pasando e quen son “os outros.

A noiva cadáver é unha película de animación de xénero fantástico do ano 2005 baseada nun conto popular ruso-xudeu do século XIX e ambientada nunha aldea ficticia da época victoriana. Foi dirixida por TimBurton e Mikel Johnson. Johnny  Depp dá voz ao personaxe principal , xunto con Helena Bonha Carter, que dá voz a Emily, a moza cadáver.

UN ANO DE PELÍCULA

Este é o lema escollido para o traballo que dende a biblioteca imos desenvolver neste curso recén estrenado. Aínda que o cine foi sempre unha ferramenta fundamental no noso traballo, este ano queremos rendir unha homenaxe á setima arte, este invento que dende a súa aparición a finais dos s. XIX revolucionou a nosa sociedade. Talvez os irmáns Lumière non imaxinaron até que punto o seu invento ía influír na vida dos homes. Ese produto da tecnoloxía acabaría converténdose nunha arte, que sería quen de facer soñar a tantas xeracións de mulleres e homes.
Peo ademais do entrenemento e diversión, o cine converteuse rápidamente nun medio eficaz de información, testemuña da historia e ferramenta básica de coñecemento. Cantas veces aprendemos máis nos cen minutos que dura unha película que en tantas e tantas clases de historia, matemáticas ou lingua? Moitas das nosas emocións están ligadas ao cine. A ficción provoca sentimentos reais que asimilamos moitas veces como vividos en primeira persoa. Cantas bágoas e gargalladas temos vertido diante da pantalla!. Cantos momentos felices temos atrapado e encerrado nunha película...

O cine é unha ferramenta consolidada no ensino que usamos en todas as materias, por iso é un tema moi axeitado para traballar en equipo dende a biblioteca e en todas as aulas. Non só imos ver cine, imos tentar tamén facelo, a traves de distintos obradoiros, algúns xa existentes como a nosa emisora Falamelide, e outros que crearemos este curso, con axudas coma a do Plan Proxecta. Por todo isto e moito máis queremos que este sexa Un ano de película.

UNHA VIAXE NO ORIENT EXPRESS

O alumnado de 1º do Ciclo de Madeira do IES de Melide, coordinado por Fernando López, ven de inaugurar unha exposición relacionada, unha vez máis, co noso  tema de traballo interdiscplinar A viaxe e a migración, entre a búsqueda e a necesidade.
Desta vez trátase dunha viaxe de pracer destinada a unha élite, xa que as viaxes no Oriente Espress foron sempre o paradigma do luxo. Pero lendo o traballo elaborado polo ciclo dámonos conta de que este mítico tren, ademais dun paraíso para os amantes do luxo, inspirou obras literarias, como o famoso Asasinato no Orient Espress de A. Christie, e foi escenario de importantes episodios históricos como o armisticio de 1918 firmado por Alemania e Francia tras a primeira guerra mundial e o de 1940 na segunda guerra mundial, polos mesmos países pero en condicións moi diferentes.

CARTA A SANTIAGO LOPO

Din que para min é "doado" escribirlle a alguén ou facer unha reflexión sobre unha novela, relato, etc., e por iso agora mesmo che estou escribindo isto. Seguro que non sabes quen son, e realmente iso non é o máis relevante debido a que serei unha deses/as milleiros de estudantes que tras ler as túas novelas che escriben para facerche unha pequena crítica sobre elas.

            Falando con certeza, nunca me gustou iso de ler, sempre preferín ver unha película ou saír á rúa antes que ler un libro. Non me gusta iso de estar quieta observando algo que probablemente non me chegue a gustar.

            Quizais por cousa do destino a miña opinión sobre a lectura mudou un chisco, pode ser porque hai moi pouco, Hora Zulú chegou ás miñas mans. Non sei moi ben por que me gustou tanto esa novela pero, o que realmente me fixo reflexionar sobre o que é de verdade a lectura, foi seguramente a súa maneira de entramar a historia. Diferente, pero ao mesmo tempo tan orixinal que, persoalmente, me enganchou durante aproximadamente cinco curtos días.

            A obra en si paréceme moi ben estruturada, pero o que máis chamou a atención en min foi a maneira na que indirectamente nos fai reflexionar sobre como inflúe o tempo nas persoas, como nos preocupa sobre todo de maneira negativa. Nisto non existe a desigualdade, afecta dende os máis cativos -que teñen un enorme desexo por ser maiores e facer todo o que lles gusta e queren- ás persoas adultas ás que lles preocupa moitas veces que será dos seus fillos, como sobrevivirán ao paso do tempo.... até os máis maiores que senten certo temor porque un día chegue esa negra sombra que os leve.

            Probablemente é nunha das poucas cousas onde a desigualdade é inexistente e nas que, por un momento, inflúe máis negativamente nas persoas máis poderosas, que senten medo por non poder gozar de todos eses luxos que posúen.

            Sen máis, darche a noraboa pola túa obra que espero que dentro de moito tempo sirva para que xente coma min se decate da dozura da lectura, que ata o momento descoñecía.

Un bico agarimoso dunha lectora con pouca experiencia.

Ana Segade

O MEU FOLGAR, RELATO RADIOFÓNICO

O meu folgar é a historia dun detective insatisfeito co seu traballo, que ao verse reflectido nun espello decide cambiar de vida para atopar a felicidade. Esta é un relato de Cristina Gómez Remeseiro e Lorena Vidal, de 4º C de ESO, escribiron e gravaron para Falamelide, a radio do Instituto de Melide, que está a piques de cumplir vinte anos.
Con este programa estreamos en Biblomelide este novo formato de guión radiofónico, a o tempo que felicitamos a Cristina e Lorena polo seu traballo.